Meets Nokia 8 Sirocco最近終於手痕買咗部Nokia 8 Sirocco。純AOSP，除咗Google Apps之外無多餘嘅Apps，亦唔會有一開機就要瘋狂disable一堆根本唔會用嘅apps嘅情況（係啊，講緊你啊Sony）發生。購買嘅原因主要係想體驗一番無線充電，而經過調查，初步確定 Nokia 8 Sirocco 係嗰合適嘅選擇。

好多人買機真係好撚鍾意攞嗰spec list出來比較，嗰cpu幾快，ram幾多，之類，卻好容易忽視系統本身對用戶體驗、系統流暢以及續航力亦有相當影響。以我之前 嘅 XZ1 Compact 爲例，我用Sony Stock ROM大概放工時會有20-30%電，但我Flash咗LineageOS 15.1 之後，一樣用法，放工電力基本上30%+，甚至上返40%。而且，一般而言，CPU好意味你部機相對會更食電，你耗電量亦跟住升。對於好多人用例用去咪又係whastapp、facebook、instrgram之類，與其去追求更高嘅性能，不如先仔細思考下，自己嘅需求係咩先。

點解會講上面堆話呢？因爲Nokia 8 Sirocco正正係嗰好例子。單睇Spec Sheet你唔會覺得有咩值得一提嘅突出之處，但無突出之處有時亦係特色。Nokia 8 Sirocco 雖然無好高深嘅配置（啱啱出仲會有人問點解係835唔係845），無令人「哇」一聲嘅靚相機，無怪物級嘅續航力（會重架契弟），亦無令人煩厭嘅M字額（我知Nokia宜家有啦）。但以原生嘅Android配以啱啱夠用嘅配置已經足夠體驗到一個流暢、穩定以及令人舒適嘅作業系統。

（上圖係keep住碌FB/G+/YouTube四小時嘅結果）睇返時間，用咗4嗰仲消耗咗55%電，即係每小時若13.7%到，換算下來應該大約可以有三個多小時。即合共嘅使用時間可以高達7小時……嗯，對我嚟講算豐盛啦。

雖然Nokia 標榜該機有Zeiss鏡，但實際上同其他手機影出嚟感受唔太大嘅分別，唯一優勢係有2x光學變焦可能會有用吧。不過我覺得手機始終係for記錄多，只要要影嘅目標能清晰記錄到，我亦唔會挑剔太多。

而係機身方面，整體嘅設計得好靚，曲面mon令整體機身可用範圍增加而令機身大小相對收細，不過對手細嘅我嚟講，要單手操作依然有一定難度……而且爲咗曲面及美觀，機身兩邊邊緣收縮得好勁，雖然美觀咗，但揸上手就好似揸住部「刀片機」咁，而且邊緣部分好易誤觸，搞到要帶套唔得（跟機有，開頭覺得佢送套好on9），呢嗰我覺得係值得改進嘅地方。但整體真係設計得唔錯，正反面嘅玻璃直頭光到可以反射得勁清楚，出外必要時可以當鏡用（唔係講笑，真）。

此外，Nokia 8 Sirocco支援無線充電，買個座或者買個無線尿袋就會顯得好方便。雖然充電座有磁力校準，但放喺袋入面，因爲地心吸力好難對準，所以買無線尿袋記得比較下大細是否合適先好買。

此外我相信好多人會介懷嘅3.5mm無咗。不過我係好耐之前就用藍牙所以影響唔大。而且集體取消3.5mm嘅好處係藍牙耳機遍地開花，技術進步亦快座，亦拜此所賜唔洗再硬食sony啲垃圾級藍牙耳機……

2018年啦，放棄啦好嗎？

另一個不得不讚嘅係喇叭。雖然降級做單喇叭，不過喇叭最重要嘅其實聲音清晰。而Nokia 8 Sirocco嘅喇叭比起其他機足足大聲一本以上，係旺角都可以聽得一清二楚…… #好

而該機最大好處就係Android One。無多餘嘅垃圾Apps（除咗Gappsssss），後臺少好多嘢，亦多出好多空間去裝自己嘢，令系統簡單唔少。不過亦因此少咗啲嘢，例如NFC 切換 on notification bar、power menu screenshot之類嘅function，不過亦有方法去取代/撳多幾個掣，又唔算咩大問題。相對地，Android One係除咗Pixel/新機之外最先食到新版Android嘅機種，而且保證有2年嘅系統更新，對於錢銀唔多/唔想密密換機嘅人（例如我），係個唔錯嘅折衷選擇吧。

至於想睇部機影出嚟嘅請點下面連結：