《Astral Chain》感想——平淡良作。,b,

Posted on Mon, Sep 16, 2019 作品評論

前言

其實我曾經有過Switch,大概係我當年畢業第一日返工嘅時候,老母打俾我話我知有人爆格,偷咗一堆電子垃圾,其中就係部switch。係年幾嘅時間期間我一直無買switch,因爲工作忙,放工亦無幾多時間打機,亦無留意switch有咩game。而宜家轉咗做freelancer之後而且唔使搭車返工,因而空閒時間會多啲啲,加上之後屋企有大停電,打算去旅遊避世,所以諗住買部switch到時可以繼續打PSO2。而呢隻game其實係某個intern介紹嘅,咪啱啱買咗switch,就嚟嘗試一下。

背景

《Astral Chain》,係由開發過《NieR:Automata》、《Bayonetta》等知名作品嘅白金工作室開發。承傳一直以來嘅風格,遊戲中嘅戰鬥手感及連段非常爽快,遊戲中嘅主角有三種武器,而主角操控嘅Legion有5種唔同嘅styles,而唔同武器 x Legion Style之間會派生出唔同嘅動作,爽快嘅連段以及豐富流暢嘅動作可以話係呢個遊戲嘅核心。

Iris

但呢個遊戲戰鬥應該只佔1/3內容,除此以外佔一定部分嘅其實係解謎/搜查類嘅情況。千中期嘅時候,每章嘅流程就係有事件/有線索需要追查,要使用遊戲內嘅IRIS系統(類似AC系列嘅鷹眼,會改變視野嘅配色,並會將重要嘅物件/人物/任務視乎用途作唔同嘅高亮期輪廓)去發現線索/顯示出正常唔會出現嘅提示,例如每次戰鬥時候最好開一次Iris,因爲會顯示其血量於畫面上(顯示一次後固定),細怪會係怪物嘅右上角斜線標示,大Boss會直接係畫面上方顯示紅色血條;又或者劇情要追緝某啲特別怪,要靠Iris系統去睇佢痕跡等等。

Legion

而除咗Iris系統外,係追緝過程中亦需要唔同Legion嘅能力。遊戲中有5種Legion嘅style,按取得順序分別係:

唔同style有唔同用途,其中係追查過程中用得比較多警犬(畢竟追緝嘛),而其他嘅會係之後解謎嘅部分會比較多。而當然,五種Legion攻擊風格亦有所不同,例如弓可以遠距離,斧頭高傷but真心慢,劍應該算係最平均嗰個。而係戰鬥中有唔同嘅風格。而且唔同武器配唔同嘅Legion嘅派生技動作亦會唔同,例如警犬配槍會派生空中連射,但配鎧甲會派生正面衝撞。嘗試唔同組合亦係其中嘅樂趣。而遊戲中亦有升級解鎖唔同嘅派生技,可以得閒試試。

而Legion本身有啲共通嘅特色嘢我喺覺得幾得意。玩家同Legion之間有鎖鏈鏈結,如果對方衝撞時候卡中鎖鏈,就會反彈並昏厥,跟住可以補刀;而玩家同Legion可以用鎖鏈360度捆住敵人亦可以令佢哋進入昏厥狀態,敵人嘅話可以予以追擊。而且唔止敵人可以捆綁Play,例如追犯或潛入嘅時候亦需要運用捆綁技巧綁起佢哋,同一個動作唔同情況有唔同用途,呢種嘅「靈活性」係遊戲唔少位置都存在着。

解謎

而頭先講話戰鬥只佔1/3內容,除咗戰鬥、查案外,另一個比重就係各種解謎。係遊戲中,玩家會查案過程/查案後,會追蹤犯人/被捲入異世界。係異世界中,幾乎都係由石頭組成,而異世界部分基本就係路途上有唔同嘅機關,玩家要善用Iris攞提示,切換唔同style嘅Legion去解謎。例如有板塊要用劍切開;或者用鎧甲style將石頭推入特定位置,又或者有一堆開關,要短時間內全部射中;又或者有啲地板會快速消失,要用popo……警犬鳩衝之類,過程需要用下腦,合理有序咁解鎖,其實都ok有趣。

流程

基本上,遊戲流程就係上面提及,基本就係查案 => 追緝 => 入異界 =>打Boss,視乎情況再loop一輪,整體體驗可以算一氣呵成,算流暢。對於某啲鍾意戰鬥系統嘅人來講,戰鬥嘅流程其實相對被分薄,因而有所負皮。不過我覺得畢竟主角定位係警察,三分成查案、解謎與戰鬥都係一種合理分配。而且偶爾會有啲小遊戲咁嘅嘢(例如開頭嘅揸車寫怪、最終章要騎警犬逃離結晶化等),其實都算豐富嘅……

畫面

其實Switch個效能唔多期待佢有幾好嘅畫面,不過我不滿從《Zelda》以來嗰種任記Switch式嘅光影效果。雖然我明白Switch效能有限,所以想美化/掩飾/改善一下3D係Switch上面嘅表現,不過講真我真心唔鍾意嗰種獨特嘅光影,本身容易令人見暈,加上《Astral Chain》畫面特效都幾豐富華麗,所以希望可以改……唉算,呢個應該都改唔到啦,學呀sir話齋, #驚就唔好玩啦 …… 不過事實上,遊戲嘅勁頭係多變嘅,視乎狀況會變化成唔同嘅角度、遠近,因而可能類似內容都有唔同感受,呢個亦算係白金工作室嘅特色之一吧。

服裝

作爲一隻可自訂人物嘅game嚟講服裝太少,除咗警察服裝外基本係成套,缺乏更動空間,真心冇乜好講。爭氣啲好嗎?

總結

遊戲直衝主線約莫25小時左右。整體來講,《Astral Chain》整體ok,作爲白金工作室嘅主打,多變嘅角度/玩法同流暢爽快嘅戰鬥系統,都係呢隻game入面搵到。不過我覺得異界方便真係變咗迷宮咁,場景設計比較單調,解謎樂趣係有,但亦希望有多少少風景,否則啲場景單一,純屬爲解謎服務有啲寡……而且服裝方面有待加強,作爲一隻可換衫game學埋啲任記啲無聊風骨唔搞DLC,甚至衫都無多件……此外,戰鬥動作雖然流暢爽快,但迴避個判定好似有啲怪。有事同一招一時避到一時避唔到,肯定係我手殘啦(棒讀)。

買唔買

呢個遊戲構成基本就係 查案、追緝、戰鬥嘅鐵三角,如果你鍾意其中一個就諗諗先啦。如果你想又想做警察(查案)、又想做暴徒(戰鬥),就歡迎立即課金,加入香港警……係立即購買,保證唔會令你失望。當然任記祖傳嘅3D光影你真係會好不適嘅,就唔好啦,命仔遠比遊戲重要。

劇情?

劇情真係冇乜好講,都係白水嘢。三句講完。唔信?嚟。主角加入警察部門,查怪物犯罪,過程中發現驚天大祕密。Boss:點解你可以咁簡單就同Legion高度同步?點解你會有咁勁再生能力?點解瀕死會暴走?爲何唯獨你可以複合Legion in 一個core?因爲!Howard!你哋就係世界上最初嘅人型奇米拉啊!啊哈哈哈哈!……好似唔止三句。是但,反正個故仔就係咁上下。