CoD簡直係每年遊戲嘅標杆，亦係種年貨，安定、統一、和諧。記得上代CoD 《Black Ops 4》出嘅時候，因爲無單機搞得滿城風雨……但比起BF1女兵風波顯得好了，畢竟，玩單機嘅唔多，買完之後個個都話，真香。而緊接着嘅作品就係今代嘅《Call of Duty: Modern Warfare》（係，無number，唔係4……）。比起神神化化嘅《Black Ops》系列，《Modern Warfare》系列真係如同名字所言，基本就係講緊比較接近現實嘅戰爭故事。既然係《MW》，當然主角有唔知跨過鬼門關嘅Price。

今代故事簡單講就係某個疑似中東嘅國家長期被俄羅斯某軍官高壓統治，甚至乎係當地鳩射毒氣屠城，美其名「清理恐怖分子」啦當然。此外當地嘅勢力包括一個恐怖組織以及反抗軍。故事開始就係講英美方面打算回收或銷毀一批毒氣，點知回程時遭受游擊隊攻擊。當地恐怖組織話唔係佢哋，而俄羅斯當地軍隊亦開始復仇。就咁，連同英美部隊支援展開一場三方亂戰。

雖然操縱角色係英美方面嘅士兵，但其實作品嘅主角係反抗軍嘅領導人，幾乎貫穿整套作品。反抗軍嘅領導係一名女性，故事中亦有關卡講述佢年少嘅故事。當時俄羅斯軍隊被恐怖分子襲擊便遷怒當地居民，決定屠城。而佢父親就帶佢同哥哥逃跑前俾俄羅斯士兵發現，掙扎之中其父瀕死，年少嘅妹妹就靠Hit and run把士兵搞到瀕死，跟住哥哥嚟補咗個尾刀。而呢個回憶關卡亦好有趣，當中有兩個士兵繞唔過要擊殺，要執起一枝左輪射殺。不過因爲係小朋友，後坐力驚人，所以射完一發就要藏匿起來，然後再射另一發，有幾分刺客信條嘅味道。

另外，除咗無腦突突突以及潛入要素以外，今作亦導入唔同元素嘅關卡，明顯地參考緊唔同嘅遊戲作出關卡設計。例如，有一關係玩家要用類似《Watch Dog》常見嘅CCTV視角，指引一位大使祕書帶同通行卡逃離大使館，而玩家就從CCTV視角指引祕書避開士兵，安全逃離。過程中無得用武力通關，必須時刻留意士兵嘅巡邏路線並避開，最後離開房間。實在有趣。

當然作爲年貨嘅《CoD》，美式英雄主義係少不免（但Price是英軍啊……）。不過比起以往的英美 V.S. bad guy 嘅套路，故事其實亦嘗試穿插當地居民嘅想法（主要以反抗軍領袖的視點）。係好多媒體新聞當中，經常報導係英美/俄羅斯/恐怖組織講啲咩，做啲咩，對於居民嘅意見卻甚少着墨，甚至乎有好多人會有種類似今作俄羅斯反派那種「你們都是恐怖分子」的極端思維，將複雜、多重、不同嘅當地居民想法簡單歸類。但實際上，又有誰人願意將自己的故土以及人民的前途，壓在混亂與暴力當中呢？係今作中，至少係王道故事外嘗試增添一些角度，亦是一宗美事。

——其實，無人希望自己的城市陷入無序與混亂當中——如果有得選擇的話。這也是，反抗者的心聲吧。

＃光復香港 ＃時代革命 ＃五大訴求 ＃缺一不可

更多截圖