大家好，而家係2020年6月19日，正是x1m2 即 Xperia 1 II首發嘅日子，預約咗嘅機今日就有得攞。而walk-in據聞要7月先有得買。咁當然寫得呢篇文，我就當然入手咗，試咗少少，於是寫咗啲自己覺得好/在意嘅地方。

我係衛訊預約及購買嘅，價錢就係7998港幣，贈品：

而本體嘅盒內當然都係嗰啲：

值得一提嘅係今次送嘅入耳式係MH750，網上好多人吹奏話音質其實唔差，但我用開wh1000m3，所以一秒就送比老豆鳥。

應該話samsung垃圾定sony勁呢？明顯地，Sony機嘅顏色好好多，samsung唔係話差，不過好似美圖秀秀P咗咁……但或者會有人鍾意啦。但Sony機嘅傳統就係正常嘅顏色，我係下面擺像比較圖，大家就一清二楚啦……

另一個比較可見嘅特點就係，X1m2無好似其他廠搞咩M字額，極致熒幕比之類。雖然熒幕比起之前都係高咗，但明顯地熒幕亦係四方型，無玩咩熒幕掘窿、圓角熒幕之類嘅on9嘢。此外，機身亦係四四方方，不過邊緣還是做咗圓角處理，睇落既有是是正正嘅工業設計感覺。

特大21:9嘅熒幕揸上手開頭有啲唔習慣。例如我習慣尾指會頂住部電話，21:9嘅話呢個就唔太可能，所以要改爲係機身中間揸實兩邊。

此外，可能受惠於18:9嘅衝擊，我試過《Idol Master？、《Cytus II》以及《Bang Dream》都能夠準確拉大到21:9而非類似某f某g某o咁鎖死16:9，相信如果並非好似乜go咁鎖死16:9嘅game都可以順利兼容，所以如果想買黎打機嘅朋友亦可以安心購入。

當然遊戲自身當然是很流暢，《崩壞3rd》效能全開亦能流暢運行。此外，今次Sony亦有名爲Game mode嘅輔助App，爲遊戲App提供各種輔助選項。CPU效能調整、自動清RAM、Screenshot、錄影功能理所當然地存在着，而當中值得講嘅係x1m2更有名爲 Heat Suppression嘅功能，間燉地說就係當開咗呢個選項後，充電嘅電量唔會充入電池而係直接供給手機嘅CPU等硬件直接消耗，有助緩和充電時打機過熱嘅問題。

呢度有崩壞3rd嘅gameplay可以睇下流暢度：

相機方面，作爲旗艦機當然搭載三個鏡頭，全部都係12MP，分別搭載F1.7、F2.4同F2.2光圈嘅鏡頭，全部都係zeiss嘅鏡頭。係，唔係zeiss認證，係真 zeiss鏡頭。相機支援快速連拍、3倍光學變焦及即時眼部對焦，當中很多技術明顯係的確從Sony相機嗰邊攞過來嘅，所以不討論硬件上嘅限制引申嘅問題（例如感光元件嘅限制引致嘅畫幅大細限制）嘅話，實際上拍攝嘅相片有可以同中階Sony相機比肩，如果你影開單反，旅行但唔想帶全套相機，想要個中間妥協方案嘅話，x1m2會係個很成熟嘅solution。至於個Camera Pro，坦白講，只係個界面比較pro啲，但可以調校嘅參數同大多數相機App嘅手動模式差不了多少。x1m2拍攝嘅相片可以係呢度睇到：https://photo.tto.moe/2020-06-19-Xperia-1-II-Taken/

今次x1m2內置用上4000毫安大電池，正常以4G LTE網絡係街度隨機行住並使用咗3個小時，主要睇youtube同睇下社交網站之類，電力從full charge 跌到68%，即3小時用了32%電力，視乎使用習慣，預計一般使用也最多6 - 10小時左右吧，這樣的電力……嗯，也算正常發揮吧？畢竟CPU亦隨着升級了。

！而係6月22日今日我再試多次，全程用咗六個鍾，都係類似吹下水，影相並碌下SNS。6小時共消耗了57%電力，也符合之前嘅預測吧。

呢個值得講講。呢個亦係x1m2花臣嘢中嘅一個重要花臣功能之一。簡單概括就係佢可以令你部機根據你播緊嘅音樂/視頻聲音隨之震動……有少少類似ps4手掣嘅玩法（Sony真係整合咗好多部門嘅嘢落來……），震動可以設定四個檔次，亦可以per app設定震動嘅幅度，從0（無震動）到4級，預設似乎係3級。呢個講真，其實真係幾好玩，睇片（尤其打仗片）可以隨畫面震動係有個爽感喺度；亦可隨節拍/聲音震動的確會有沉浸其中嘅感受。但，如果你會聽住歌做其他嘢嘅話，熒幕熄咗當然震動會暫時停止，但開住熒幕嘅話佢會依然根據歌曲節拍震動，會有啲覺得阻住曬嘅感覺。

今次Sony係X1M2落咗好多力，好多其他部門（主要係電視嘅Bravia同相機Altha）技術都整合其中，例如：

但坦白說，以上對我比較無感，因爲首先顏色我最多識分sony vs samsung呢啲超明顯嘅區別；而Speaker我好少用，乖寶寶都戴耳機多；音質方面雖然我從128到320kbps嘅歌都有，但大多經過降噪處理（if有噪點），而高音質嘅細膩我亦唔係好聽得出，所以真係唔大影響……

所以，以上科技係咪真係有用呢？真係有用。係咪適合多數人呢？亦未必係，要視乎你自己追求到咩程度。如果從聲音同顏色畫面嚟講，目前x1m2應該仲係最top嘅，但你要有用你首先要分得出好壞先，係咪？當然你亦可以學我咁，買嘅只求spec講出來爽，哈。

係6月24號嘅今天，我終於去旺角嘅Sony Store拎到贈品Momax Q.Power Pro。

簡單介紹下啲spec先，Q.Power Pro係內置8000毫安電池，有一個USB-A作輸出及USB-C作輸入&輸出。兩者均支援Quick Charge 3.0及最高18W嘅PD3.0快充。

而Q.Power Pro本身亦支援最高10W嘅快速無線充電並且搭載着3個線圈。即意味着，上圖嘅幾乎整個表面都可以充電，免卻了調校位置之苦。甚至乎可以直接把充電器同電話一齊放入衫袋就可以充電，十分方便。

當然如果僅僅如此我唔會山長水遠去旺角拎件咁嘅贈品啦。呢個真正嘅價值係，佢會附送個底座，把作爲尿袋嘅本體插入底座，可以變身成爲充電板並同時爲電話及尿袋充電，我就係覺得呢個設計有趣先會去拎，Yeah。

其實個總結好簡單——買得起就買部啦，唔會令你後悔嘅。Best phone of this year, yeah.

至於產地，X1M2似乎係 Made In Japan嘅？