[SAD STORY]
我唔知有冇講過，無我就講一次啦。
我老母嗰邊嘅鄉下有個表哥，係我媽嘅細佬嘅親生仔，不過佢老竇，即係我老母個細佬係個老實人，非常隨和，所以識得啲女人基本上都 #係雞係公廁，所以後來慢慢變咗單親家庭，我表哥基本上就喺老母嘅老母，即係阿婆湊大，亦可能係好多原因綜合（包括鄉下地方大家都比較隨便地放養），久而久之我表哥算係出名硬頸嘅小霸王，講多幾句離家幾日再返來唔係咩出奇事。我聽得最多嘅就喺聽我媽轉述其他同居嘅人抱怨表哥點樣唔聽話，點樣百厭。
「咁你哋又就佢？」
「唔就佢又玩跳樓啊嘛。」
「……咁咪跳囉。」
「唔嘚，佢萬一真係跳點算……」
「……………………」
其實真係唔會跳，就算跳都喺二樓跳，取巧嘅嘢佢唔識咩……點解我知？雖然一年過去一次，即係新年啊，可能有些疏離感，所以我同我表哥關係相處得唔錯，雖然唔會話談心咁誇張，但基本上每次上去老母鄉下，我都會同佢玩返一兩日。試過齊齊係網吧打通宵《CS》、《魔獸》；試過肝《夢幻西遊》從朝早七、八點到夜晚晚飯時間；試過由佢帶路去咗啲隱藏小攤掃街食美食；亦試過兩個未成年人由佢坐車頭我坐車尾偷偷「借用」摩托車兜風；亦約咗早起出遠門玩不過我醒唔來跟住佢彈我JJ彈到悶，一醒來見到佢生着悶氣係我牀邊。或者我同啲「大人」唔同掛，又或者其實我哋當時都喺細路仔，反正當時都玩咗好多嘢，仲記得我會DL盜版單機GAME係睇佢玩《刺客信條》初代玩得好似好正（個故仔）……
咁我記得，大概係我仲讀緊IVE嘅時候，咁我老母就話我知我表哥佢患上骨癌，介乎早期到中期之間（我老母轉述佢講得1999對唔住）擴散咗但未擴散開，醫生話係截肢隻腳+食藥基本無問題。好啦，你估下個故仔跟住點發展？無錯，既然係Sad story，咁當然係死咗（超級劇透），但咪住，既然早期又未擴散，咁截肢之後定期檢查咪完事？
精彩嘅事情來啦，之後同好多無為而死嘅病人類似。我表哥佢本人似乎對做手術態度麻麻（我估好大機會因為我表哥好鍾意踢+睇足球，所以猶疑咗），佢周遭嘅親友家人都喺話唔使怕嘅唔想做就唔做啦，遷就佢——或者應該話，個個都不想被責怪，所以選擇了最消極無為而又大家能接受嘅上限。跟住就喺嘗試很多嘅偏方，叫我媽代購一啲聽講有效嘅藥物試試，或者好多癌症大師去睇，但死都唔肯接受最正規、最合理而又簡單嘅手術。
「仔啊……你表哥骨癌擴散咗啦。」
「哈，唔係做手術咩？」
「……無，無啊。」
「我又叫你叫佢做架wo？」
「咁佢唔願意架嘛，佢仲話要佢做啫係要佢跳樓。」
「佢唔會架。」
「佢會架！！！！！！！！」
「OKAY……」
ok囉，ok啦得未。反正我最後叫我媽話我叫佢最好做手術，唔好搞咁多唔知點、又唔知會點嘅嘢，簡簡單單截肢好過因此喪命，況且只係單邊腳，真係要踢其實唔係話唔嘚（ok我知你會話我涼薄啦，但事實，腳定命梗係命仔啦，ok？）。
最後唔知究竟係表哥佢抵唔住頸終於接受截肢手術，定喺佢老竇用帶佢去歐乜杯比賽作條件，又或者佢真係聽咗我話，反正過咗唔知兩個月三個月定四個月（唔好意思啊我過咗三日就會喪失時間距離感記唔清），最後都喺做咗截肢手術。
最後我同我媽夾到一日，齊齊北上特登去睇做完手術嘅佢，當時佢仲好精神，甚至家人特意為佢安排咗包咗間雙人定三人病房方便照顧佢嘅家人（主要係佢老豆啦）過夜咁。我見到佢，佢主動打招呼。
「喂。」
「你點啊。」
「咪咁。」
佢聳咗聳肩，之後大家就無點講過嘢，亦唔需要講咁多嘢，盡在不言中。佢接過佢老竇批比佢嘅水果，睇住佢食咗陣，幫手係醫院嘅商店買咗一啲日用品之後，係下面食咗餐味精之後就離開了。
過咗排先知，原來佢骨癌截肢後檢查發現原來已經擴散咗過無耐就過世，好彩嘅大概係佢過世前同佢老竇一齊去咗歐洲定美國睇咗場國際級嘅球賽見到自己啲偶像球星，算係開心過一番吧。
好啦，賽後檢討，你覺得整件事邊個有錯？係無勸到佢嘅家人錯？係醫生無強制執行嘅錯？定喺佢本人嘅猶疑害死咗自己？又或者，無人有錯？又或者人人都有錯？好啦，我媽點諗呢？
「最衰都喺個女人（指表哥嘅生母，表哥佢老竇嘅前妻），都話咗佢係雞係公廁仲要癡埋去，唉呢個細佬就喺心軟老實，容易比啲姣婆呃搞到屋企無日安寧，搞到佢（表哥）學壞曬……」
無為過失唔係過失，因為無做所以無錯，最錯都喺啲「淫邪姣婆」，自己無錯，屋企人無錯，唔趁早治療無錯，唔怪日日見嘅屋企人，唔怪日日同佢哋聯絡嘅自己，怪個一年見唔到一次生母「淫邪」。
正如唔打疫苗死咗無人錯，打完死咗之後隨時糖尿病都喺疫苗嘅錯。正正經經醫生嘅意見唔聽，專業報告唔睇，延誤咗之後出事先賴天賴地，但只要好似港府咁，唔做，就唔係我錯。
唉，我唔知邊個錯但係，唔好講到自己無責任咁囉。
PS：雖然我成日同老母鬧交但我哋關係唔差，可能因為都鬧慣咗交，所以佔中無鬧到離家，無攞刀斬人，無玩打機就斷電，亦無咩黃絲/藍絲斷六親。鬧完之後去瞓返醒，日子咪又係咁過。