買咗啲第三方嘅頭試，從上到下分別長針金屬頭，圓頭以及蘋果原廠頭。

要注意嘅係，記得一點要癡mon貼，那怕係最差嘅玻璃貼都好一定要癡，因為除咗原廠，其他呢啲副廠你會見到係金屬頭來，實會花mon，所以一定要痴（除非你唔介意跟住會用到壞啦）。

坦白講寫落手感好有阻力，十足十揸住枝水筆咁，但缺點係因為係針頭所以太細力好容易斷筆，而且傾斜少少會好易誤判咗大範圍令到brush從小範圍嘅線變成類似大範圍填色嘅掃筆咁。只建議筆記派想要真筆個種阻感個種人買，繪圖真心唔適合，因為一些細力嘅筆鋒會直接detect唔到。

揸落會有寫字嘅沙沙聲，寫落感覺會比較似係比較硬嘅鉛筆個種感覺，比起長針靈敏唔少，細力嘅時候極少斷筆嘅現象，不過始終係金屬頭要小心真係要痴mon貼。

而比較之下原廠嘅大細力感應都做得好好，但缺點係真係好滑，非常滑，就好似holo fans咁滑，但畢竟係蘋果自己嘢所以整體嘅接觸和靈敏都適中，只係冇乜阻感……不過如果你真係接受到都未嘗不可以，至少膠頭唔怕磨花個mon。