呢套戲其實唔錯，唔知道阿富汗嘅來龍去脈嘅話會覺得好難笑且尷尬，而你若果對美國啲on9嘢有啲認識，對阿富汗問題有最基本嘅理解，你會明白主角個種忠誠式嘅蠢，美國對阿富汗那種掩耳盜鈴式嘅無知，以及奧巴馬政府個種奸狡，以及對美國個種自大嘅諷刺，以及阿富汗總統由頭廢到尾個種感覺，整條片充滿着睇落尷尬但瞭解後面成因之後你只能全程苦笑。
例如點解種海洛因？因為種唔到棉花。點解唔嘚？國會唔會批撥款等阿富汗同美國農民競爭。
又例如主角想攔截奧巴馬整個突襲meeting，跟住反被奧巴馬玩遲到跟住話唔得閒見面。
又或者一個士兵同主角講，因為克制唔誤殺而得獎章，但同時係阿富汗嘅佢哋根本分不清平民和叛亂分子，而主角個種只能以話術待之嘅諷刺。
主角心心念念為當地人創造更多工作、秩序與和諧，但同時，面對阿富汗人回答只想外國軍隊離開，之間反差嘅個種無奈。
又或者，主角問阿富汗總統某個軍事行動嘅意見，感冒嘅阿富汗總統索性熄機睇電視娛樂，而主角踩上門，總統只能答「事但啦反正你前任都無問過我，你知我知呢啲嘢唔使問我approval啊」個種無奈和諷刺，以及阿富汗總統個種廢。
當年唔知背景你會覺得尷尬，當你知道了，整條片充斥住不同程度嘅黑色幽默，但又不會令你笑得開懷，更像是阿富汗之於美國，將條魚骨卡在喉嚨，不上不落個種無奈。
而更無奈的是，任何強國總喜愛以軍事、治安或法律手段解決治安問題、民心問題、管治問題，而對自己嘅不受歡迎和受厭惡一無所知。不，就算知道，但也無法回頭吧，睇住套嘢令我諗起《幼女戰記》主角對帝國軍嘅批評方向（意摘）：軍隊的策略很正確，但亦沉迷於理性與正確嘅戰爭當中，但靠正確是打不贏（對民族主義者的）戰爭的。
最後講返少少電影本身，坦白講笑點係有，而且相當多苦笑點嘅黑色幽默反戰電影，全程觀感係舒服嘅，但劇情嘅編排和劇情太鬆散，對阿富汗戰爭無認識嘅人只係見到主角去咗呢度，去咗嗰度，好似冇咗條明確嘅主線，亦冇乜緊湊嘅劇情，加上主角嘅表演有啲用力，變得以電影來講顯得用力，如果可以我覺得主線劇情編排和選角上可以再好啲。