Fitbit Versa 2 感想。

Posted on Fri, Oct 4, 2019 科技趣聞 Fitbit

其實Versa 2我喺香港開賣當日就收到電郵,直接9rush咗去買咗。用咗個幾月Fitbit Versa2,可以嚟寫寫感想。

電力

Fitbit嘅智能手錶主要賣點之一就係強大嘅待機/使用時間。現時普遍流行嘅Apple Watch/Wear OS嘅智能手錶功能都好豐富,不過最大可惜地方係使用時間有限,正常使用嘅話一日定必要充電,用兩日係件好困難嘅事。但,Fitbit嘅智能手錶普遍一般可以用到三日以上。上代嘅Versa嘅正常使用係2-5日,如果只開tracker/sensor嘅待機嘅話可以上七日。而到今代嘅Versa 2正常時間可以4-7日(視乎你開幾多嘢),如果純待機嘅話可以更長,精簡一下十日都勉強可以。去一啲短期旅遊嘅時候非常方便。

外觀

其次Versa 2係外觀上亦有一定變更。首先係右邊兩粒掣消失咗,變咗一個mic。以前呢兩個掣可以shortcut開app,之後可以係app入面有特定function。例如timer可以暫停,另一個停止結算咁。而家取消咗應該會有人覺得唔方便,不過我覺得反正本身係touch screen,無咗其實影響唔大。此外,相比初代嘅尖銳嘅熒幕邊緣,Versa 2係邊緣做咗曲面化處理,係滑動操作手感上舒服咗好多。

Alway-On Screen

Versa 2亦終於有Alway-On Screen,可以同Android嘅Alway-On Screen一樣係待機時候顯示簡化嘅資訊畫面,可以顯示時間、步數等資訊。不過我熄咗,開返個手勢auto開/閂熒幕實用好多。

Alexa

另一個新功能就係Alexa語音助手。因爲我屋企用Ikea嘅smart light鏈接Alexa,可以透過Alexa語音助手遙控開/閂。除此以外亦有好多唔同玩法,播歌、報天氣等等。不過目前Alexa唔支援粵語,得英文及日文等語言,識外文當然ok,唔識嘅話其實真係玩具……

小結

其實Versa 2對比Versa 初代,主要都係啲小修小補,其實改進都有一定嘅,不過好似又唔係咁多,尤其係Fitbit Pay到而家都未有香港……其實Fitbit我覺得要改進一下成個系統,諗吓個selling point,唔係淨係靠tracker+長待機作賣點真係有限公司……