《魔王勇者》——戰爭即和平,貧窮即富有,寫於可能係WW3。

Posted on Fri, Aug 14, 2020 時政評論 作品評論

記得我初戀女友係個知識與美貌並重嘅美少女(棒讀)。基本上係我所愛慕同渴求嘅理想伴侶,對知識追求、對無知嘅敬畏,以及大奶奶(喂)。我擇偶條件第一係比我聰明及有學識,因爲初戀對象係咁叻女以爲這條件唔算低,跟住發覺有正常智力嘅人係社會上原來都算稀有生物……so9sad。

講遠了,在交往時候,其中一個介紹比我嘅作品係《魔王勇者》。簡單概述故事就係,作爲特攻部隊直達魔王城討伐魔王,意圖以此總結戰爭。而魔王乘機向勇者示愛(?!)之餘,也爲此講出人魔戰爭重要事實:僅僅討伐魔王,戰爭都不會完結的。無論係人類方定係魔族,都「需要」這場戰爭。

背景

故事背景就係魔族同人族有長期戰爭,彼此仇視並視對方爲「邪惡化身」,並爲此互相奸詐討伐,長年處於戰爭狀態。而爲了終結戰爭狀態,(表面上)搵咗勇者組團,試圖透過直搗黃龍搞討伐戰,解決「魔王」呢個問題。而故事開篇就係勇者拋下隊友自己直闖魔王城而單獨面見魔王。勇者一邊被示愛,亦一邊開始對戰爭與和平嘅討論。

對於代表人類嘅勇者而言,佢認爲戰爭與窮困嘅問題根本原因係魔族對人類嘅殘暴統治及侵略。但事實上,人魔戰爭嘅現況卻是不分人類和魔族,都期望嘅現況。甚至乎若果戰爭結束,不論成敗,人類各國都會經歷慘烈嘅階級洗牌及既定階級嘅徹底崩壞。

魔族

在故事中,大抵魔族平民都係主戰,驍勇善戰並希望打贏人族。而值得講嘅係妖精同火龍爲主嘅議和派及主戰嘅獸牙族同蒼魔族。妖精族就性格溫和,係典型嘅和平主義者。而火龍雖然比較頑固但至少係可以溝通嘅對象,獸牙族嘅銀虎亦比較容易理解,血氣方剛嘅小朋友想透過侵略人界建立自己嘅狩獵場玩,而值得講係蒼魔族……嗯,不過之後再講。

戰爭發大財

而到了人類呢邊,個故事就複雜得多了。戰爭係種極度消耗資源嘅行爲。要打仗首先要有士兵同武器,士兵首先需要歷月嘅訓練,訓練體能和兵器嘅用法,並需要爲其提供工錢和糧食來維持軍隊。而實際戰場上,槍劍、馬匹、頭盔鎧甲之類等軍備品其實消耗率唔低,需要常時補充(現代嘅槍械仲爽,一次性嘅子彈粒粒都係錢)。

而這些資源嘅調度和交易少不免需要龐大嘅金錢,戰爭唔係話停就可以停嘅事,加上戰爭對軍備消耗大,大抵從事軍備相關售賣嘅商人基本上係戰爭中大撈得撈一筆,而大量金錢會集中於一羣識時務者手中,結果係資金最後流向一批商人手中,戰爭越打落去,佢哋會繼續發財,不論勝負,都能妥妥賺錢。當然,兩邊賣軍備是基本combo吧。

堅定捍衛黨中央

你以爲發家致富只有商人?當然唔係,除了商人外,其實遠離戰爭前線嘅中央國家嘅權貴們也能瘋狂發大財。由於名爲魔族嘅外敵出現,們因爲嘅恐懼魔族,使得人們放棄,或者話人們開始不得不爲了反抗魔族,而默許了人類整體進行了中央集權,使得中央政府獲得空前龐大嘅資源和權力,而且只要舉着反對魔族嘅大旗,大部分壞事都可以被暫時無視,真好。

雖然在戰線前方嘅國家和城市因爲戰爭大抵滿目瘡痍,普遍嘅人民因而流離失所,一堆堆窮人不得不遷移謀求生路。但在遠離戰線嘅後方嘅中央國家一帶,卻唔係咁嘅一回事。基於物資交易和調度嘅需求,部分大後方嘅城市或國家因爲頻繁嘅貿易,成就了繁華嘅首都及一些實質由商人組織控制嘅貿易城市。係呢啲地方,大多嘅富人和權力階層毫不需要擔心安全及食物嘅問題,仲可以日日開Party,飲紅酒,爽過日子。而處於戰線前線嘅國家,因爲戰爭和地區關係而處於長期貧窮狀態,而尤其係故事中嘅南方三國在較長時間都不得不服從中央國家,收受中央嘅錢財維持貧瘠嘅國家財政,扮演小丑嘅角色,適時打下勝仗或敗仗去維持戰爭能正常運作下去。

而作爲片中嘅主流宗教嘅教會,藉着自身係民衆之間嘅公信力及信仰心,維持社會嘅秩序和道德——對於民衆而言,提供教育、治療及洗禮崇拜等實用與儀式兼具嘅教會,比起稅收先見到嘅政府或遙遠嘅貴族之類,教會和一般民衆嘅關係更加密切。畢竟中世紀文明水平嘅《魔王勇者》中,領土龐大嘅國家/領主基本上除了自己核心城市週邊以外,因爲交通問題所以難以管理,所以爲了傳教而廣設教會嘅宗教會擔當現代社會中類似民政署嘅社會福利措施實際執行者,有效填補政府唔願服務嘅非城市地方嘅地方福利及穩固民心。而教會作爲社會秩序嘅穩定者,爲了社會秩序嘅穩定以及能夠收到更多嘅「回報」,再加上戰爭期間能使得人們更加依靠教會(不論實用上還是心理上),所以教會亦會積極維持戰爭,甚至乎不惜一邊高呼魔族邪惡,一邊背地裏同蒼魔族合作,由蒼魔族演繹壞人來維持戰爭,真棒。

永續戰爭

到呢度你會發現,《魔王勇者》嘅世界觀下,戰爭係受商人、政府以至教會都係既有制度嘅穩定者,並且幾乎所有利益集團都需要戰爭去維持佢哋嘅既有利益和將來利益嘅穩定獲取。爲此,佢哋特意派出勇者一行作爲神風敢死隊直接討伐魔王,大多數情況下勇者一行人都會輸,他們就可以再炒作一輪民粹了。若果不幸贏了,恐怕結果會語魔王所言,人類嘅權貴們會擁立新嘅魔王作爲傀儡,使得連魔界亦能服膺於佢哋嘅超利益鏈,如果有咩壞事就賴魔王,豈不妙哉?

更糟糕嘅係,對人類而言呢場戰爭不得不維持下去。政治上,只有對抗魔族嘅大義在嘅情況下人類才能摒棄己見互相鬥爭,所以在人類內部亦需要戰爭去維持人類內部嘅和平。亦因爲對魔族戰爭團結了人類,對於疫症嘅防治和衛生管理亦有所躍進,整體人類社會還是有所進步的。假如戰爭停止嘅話,會有大批爲戰爭生產嘅資源變成廢物,不少原本軍備生產商等嘅戰爭經濟相關企業、工廠會連鎖倒閉、許多戰爭時期特產嘅無學歷士兵會因爲缺乏其他技能而成爲遊民,最終造成大家齊齊失業,富人們冇得再夜夜笙歌,而邊境一啲貧窮嘅國家會因此失去中央援助,嚴重嘅話就會饑荒、暴動然後政權崩潰,大家都會係輸家,真係可喜可賀。

現代

到了現代,受限於火力和破壞力提升,大規模且慘烈嘅戰爭都係少數,現代多數嘅熱戰大多都係大國攞先進裝備欺負一下啲落後國家或者民兵,跟住可能被對方靠着人道主義同游擊戰拖入麻煩嘅泥漿摔角,之後不得不撤兵也不是奇事。

但現代大國間基本上唔會正面打仗,畢竟現代戰爭火力勁,資源開銷巨大,基本現代大國互相開打,同《魔王勇者》嗰種中世紀不同,基本就係燒錢嘢。所以,現代炒作戰爭路線的幾乎都係口頭或形式上嘅事情,好似美蘇冷戰,雖然十分驚險,但事實上當時美蘇雙方心裏都不想真係打起來,畢竟彼此都有能力瞬間消滅對方首都嘅火力……這亦係種恐怖平衡吧。

係美蘇之後,自由貿易主義席捲全球,曾幾何時,以美國爲首嘅歐美列強希望透過自由主義使得一堆國家尤其是中國可以從封閉中走向開放。可惜嘅係,從結果而言,中國雖然富強了,卻和美國對自由民主中國嘅期待背道而馳之餘,更成了對美國而言最大嘅威脅。

睇着《魔王勇者》對戰爭嘅演繹,不禁想起嘅係近年嘅中美衝突。明顯地,中國之間並沒有真正發起戰爭,亦未陷入永恆戰爭嘅輪迴當中,但戰爭嘅苗頭已經種下。

魔王

在美國方面,多年來美國希望透過自由貿易和輸出民主價值使得能賺中國錢之餘,亦能把中國變得稍爲民主少少,希望即使不能多一個盟友至少能少一個意識形態層面都敵對嘅國家。——當然,美國而言,會聲稱因爲中國多次盜竊美國公司知識產權、無視條約嘅契約精神、對香港、新疆等國內多個城市嘅人民嘅人權嘅打壓,佢哋係正義之師云云。

中國亦很喜歡攞着不着邊際嘅指控去回擊美國,虛無一點會鍾意指責美國根本唔係政治之師,甚至美國你也是同等污穢去回擊。正路一點中國會認爲係美國刻意打壓中國,希望維繫美帝霸權嘅事實。

很諷刺地彼此都會攞着對自己有利嘅事去盡情宣揚,對自己唔好嘅事就係魔王嘅錯,很方便吧。彼此都會選擇對自己有利嘅事情去宣揚,有弊端嘅事情就草草掩埋。

現實

唉算,寫到呢度我要開始放飛自我了,之後嘅大抵會《魔王勇者》嘅內容脫離了。不過其實,想寫呢篇文章其實亦同該作脫不了關係。係重看嘅時候我其實同時睇緊一啲近日嘅新聞,我就係到諗,究竟仍然身處和平嘅我們,同戰爭嘅距離有多遠?和平嘅日子係咪就快到頭?

曾經,有人會認爲,美國對中國嘅制裁都係做下樣,國會喊話如此,香港民主法如此,林鄭面對制裁傳聞時更淡定話反正唔去美國,事但啦。到了香港製造標籤風波及近日嘅港官制裁案,大家才後知後覺發覺,啊,原來美國玩真的。

捲入大國之間嘅爭鬥意外地,一啲都唔好玩。曾幾何時,香港呢座小城市係靠着左右逢源搵食,在中美兩邊各攞啲啲謀求生存空間,並以此活得很好。但在中美對抗嘅大勢下,香港政府卻選擇了放棄獨立自主嘅道路,放棄既有利益,反而把自身命運同中央國家緊緊地捆綁在一起,如同故事前嘅南方三國那樣,把自己嘅命運交託於人,交託於上意。

我睇住那國家爲了中央嘅金援不得不明知送死都要把士兵們送上前線,又想想今天香港,在魔族與人族嘅爭鬥中,點解我哋非要站隊,進入這個沒有結束嘅對抗中不可?

記得我初戀女友係個知識與美貌並重嘅美少女(棒讀)。基本上係我所愛慕同渴求嘅理想伴侶,對知識追求、對無知嘅敬畏,以及大奶奶(喂)。我擇偶條件第一係比我聰明及有學識,因爲初戀對象係咁叻女以爲這條件唔算低,跟住發覺有正常智力嘅人係社會上原來都算稀有生物……so9sad。

記得我初戀女友係個知識與美貌並重嘅美少女(棒讀)。基本上係我所愛慕同渴求嘅理想伴侶,對知識追求、對無知嘅敬畏,以及大奶奶(喂)。我擇偶條件第一係比我聰明及有學識,因爲初戀對象係咁叻女以爲這條件唔算低,跟住發覺有正常智力嘅人係社會上原來都算稀有生物……so9sad。