複雜問題可以有簡單方案。

Posted on Sat, Mar 6, 2021 時政評論

大家真係鍾意減稅……坦白講我都係識得富豪朋友S(放心佢唔上Facebook)先認識到原來大家鍾意減稅唔係無原因嘅——其實派消費卷好,派錢好,其實都係複雜版嘅減稅,佢本質係獻祭政府嘅$$去令整個大市場多咗錢,而差別係派消費卷刺激嘅係零售,派錢嘅話主要受益嘅係輕奢侈品。

我知道很多人會鬧政府點解唔直接派錢比香港人,但我覺得大家要掉返來諗,呢個派錢方案,受益嘅會係啲咩人先?當然普遍派錢當然受益嘅係香港市民,而且因爲係齊頭式福利,所以按比例而言窮人遠比有錢人受益,但你要諗多步係,呢筆錢會點行?坦白講,我覺得若果有幾千甚至過萬嘅額外收入,大多數人會買電視、手機、電腦、平板等非必須嘅輕度奢侈品(唔會有人同我拗現代社會手機點會唔係必需品掛?),而呢筆金錢就流入咗衛訊、豐澤之類嘅商鋪,然之後再流入品牌和製造商嘅手中。

ok,然之後我哋諗下,呢次疫情衝擊最大嘅行業係咩:零售、飲食等等嘅行業。呢類受影響最大嘅行業嘅特點係每次消費額低,有一定替代方案但又唔係完全取代嘅必需品,但係又唔想啲人去換部iphone或者食個大餐就冇咗,佢夠究極目的係增加市場嘅流動資金,咁經歷漫長嘅內部議論,所以先搞出消費卷呢個計劃。甚至乎有分分鐘仲想乘機推廣埋非接觸支付之類。當然計劃有好多該罵嘅地方,但我至少覺得唔係乜「屎忽諗出來嘅方案」囉。

我覺得,香港政府尤其係林太政府有種病係好鍾意做老母,鍾意做香港人嘅老母,教香港人點樣使錢,成日先劃一個太過具體嘅目標(刺激零售),再倒返轉去寫政策,寫方案,跟住又寫得一塌糊塗。但,複雜問題可以簡單解決,香港係乜?經濟城市,通街都係中小企,你想間企業可以捱落去,噉你叫佢交少啲稅=佢多咗錢可以用,佢多咗錢用,先可能係逆境下嘗試開拓新業務來求生存。而且減稅最大好處係成本可以隱藏成0——因爲你稅局已經存在,增加嘅成本只係稅局職員要OT,但整個申請系統已經存在,而整個報稅程序都係每年繞不過支出。但若果你派錢或者派消費卷點都要增加咗一大堆成本於官僚系統,倒不如放出呢啲成本,透過扣稅回饋予以企業和人民仲實際而且有效。

複雜問題有時可以有簡單方法解決,但羨慕SG嘅林鄭總覺得自己係香港人嘅老母(苦笑)。